ଚଳିତ ବର୍ଷ ନବଯୌବନ ଦର୍ଶନ ହେବନାହିଁ !!!

ପୁରୀ ଶ୍ରୀମନ୍ଦିର ତରଫରୁ ସୂଚନା ଦିଆଯାଇଛି ଯେ ମହାପ୍ରଭୂଙ୍କ ନବଯୌବନ ଦର୍ଶନପାଇଁ ଆସୁଥିବା ଜନସମାଗମକୁ ଆଖି ଆଗରେ ରଖି ସେମାନେ ଚଳିତ ବର୍ଷର ଏହି ସମାରୋହକୁ ସମସ୍ତଙ୍କ ପାଇଁ ଉନ୍ମୁକ୍ତ କରିବେ ନାହିଁ୤ ଅର୍ଥାତ କେହି ବି ନବଯୌବନ ଦର୍ଶନ କରିପାରିବେ ନାହିଁ୤ ଯୁଗଯୁଗରୁ ମହାପ୍ରଭୂଙ୍କ ନବଯୌବନ ଦର୍ଶନ କରି ବୈକୁଣ୍ଠପ୍ରାପ୍ତି ହେଉଥିବା କଥା ସମସ୍ତେ ଜାଣିଥିବା ହେତୁ ଏହି ଦିନ ପୁରୀ ସହରରେ ଲକ୍ଷାଧିକ ଭକ୍ତ ସମାଗମ ହୋଇଥାନ୍ତି୤ ଏବଂ ଚଳିତବର୍ଷ ନବକଳେବର ହୋଇଥିବା ହେତୁ ଏହି ସମାଗମ ଦଶଲକ୍ଷରୁ ଅଧିକ ହେବ ବୋଲି ଆଶା କରାଯାଉଛି୤ ଶ୍ରୀମନ୍ଦିର ତରଫରୁ ଦିଆଯାଇଥିବା କାରଣ ମଧ୍ୟ ଯଥାର୍ଥ ବୋଲି କୁହାଯାଇପାରେ୤ ଏତେ ସଂଖ୍ୟାରେ ଭକ୍ତଙ୍କୁ ପୁରୀ ଶ୍ରୀମନ୍ଦିର ସମ୍ମୁଖରେ ରହି ମହାପ୍ରଭୂଙ୍କ ନବଯୌବନ ଦର୍ଶନ ସୁଯୋଗ ହୁଏତ ନ ମିଳିପାରେ ଏବଂ ସେମାନେ ଦଳାଚକଟା ହେବାପରି ପରିସ୍ଥିତିର ସମ୍ମୁଖୀନ ହୋଇପାରନ୍ତି୤ ତେଣୁ ଏହି ଉତ୍ସବକୁ ବାତିଲ କରାଗଲେ ଭକ୍ତମାନଙ୍କୁ ଅଯଥା ହଇରାଣ ହେବାକୁ ପଡ଼ିବ ନାହିଁ୤ ଆମେ ମଧ୍ୟ ଏହାର ସପକ୍ଷରେ ହିଁ କହିବୁ୤ କାରଣ ସତରେ ଅତୀତରେ ଏମିତି ଅନେକ ଘଟଣାର ଉଦାହରଣ ଦେଇହେବ୤ ଭଗବାନଙ୍କ ସୁନାବେଶ ଦେଖିବା ବେଳେ ଦଳାଚକଟାରେ ଅଜସ୍ର ଲୋକ ପ୍ରାଣହାନୀ ହୋଇଥିବାର ଖବର ସମସ୍ତେ ଜାଣନ୍ତି୤ ତେଣୁ ଏହି କାର୍ଯ୍ୟକ୍ରମ ନ କରାଗଲେ ବି ଚଳିବ୤ ଅପରନ୍ତୁ, ଆଜିକାଲି ସମସ୍ତ କାର୍ଯ୍ୟକ୍ରମ ଟିଭିରେ ଦେଖି ହେଉଥିବା ଯୋଗୁଁ ଆମେ ଅନୁରୋଧ କରିପାରୁ ଯେ ଏହି କାର୍ଯ୍ୟକ୍ରମକୁ ବରଂ ଟିଭିରେ ସିଧାପ୍ରସାରଣ କରାଯାଉ ଏବଂ ବଡ଼ ବଡ଼ ପରଦାରେ ବଡ଼ଦାଣ୍ଡରେ ଭକ୍ତଙ୍କ ପାଇଁ ରଖାଯାଉ୤ ଏହା ଫଳରେ ଲୋକମାନେ ଆଉ ମନ୍ଦିର ସମ୍ମୁଖରେ ଗହଳି କରିବେ ନାହିଁ ଏବଂ ଦଳାଚକଟା ହେବ ନାହିଁ୤ ଏବଂ ଏଥିନିମନ୍ତେ ସରକାରୀ ସ୍ତରରେ ସୂଚନା ଦିଆଯାଇପାରେ, ଯାହା ଫଳରେ ଅଜସ୍ର ଭକ୍ତ ବଡ଼ଦାଣ୍ଡରେ ଜମା ହେବେ ନାହିଁ୤ ଆସନ୍ତୁ ଏହି ବିଷୟକୁ ଆଉ ଅନ୍ୟ ଗୋଟିଏ ଦୃଷ୍ଟିରେ ଦେଖିବା୤ ନବଯୌବନ ଦର୍ଶନ ପ୍ରତିବର୍ଷ ଅନୁଷ୍ଠିତ ହେଉଛି ଏବଂ ପ୍ରତିବର୍ଷ ଲକ୍ଷ ଲକ୍ଷ ଭକ୍ତ ଏହା ଦର୍ଶନ କରିଥାନ୍ତି୤ ଅବଶ୍ୟ ଚଳିତ ବର୍ଷ ଅଧିକ ଭକ୍ତ ଆସିବାର ସମ୍ଭାବନାକୁ ଏଡ଼ାଇ ଦିଆଯାଇ ନପାରେ୤ କିନ୍ତୁ ସରକାର ଓ ପ୍ରଶାସନ ଚାହିଁଲେ ସବୁ ସୁରୁଖୁରୁରେ ସମାପନ ହୋଇପାରିବ୤ ତେଣୁ ଆମ ମତରେ ଯୁଗଯୁଗରୁ ଚାଲିଆସୁଥିବା ପରମ୍ପରାକୁ ବନ୍ଦ କରିବା ଉଚିତ ହେବ ନାହିଁ୤ ଅବଶ୍ୟ ଚଳିତ ବର୍ଷର ନବକଳେବରରେ ପ୍ରାଚୀନ ସମସ୍ତ ପରମ୍ପରାକୁ ଧୁଳିସାତ୍ କରି ଦିଆଯାଇଛି ବୋଲି ପ୍ରମାଣିତ ହୋଇସାରିଛି, ତେଣୁ ଏହି ପରମ୍ପରାକୁ ମଧ୍ୟ ବନ୍ଦ କରିଦେବା କିଛି ଅସମ୍ଭବ ନୁହେଁ୤ ଶ୍ରୀମନ୍ଦିର ଭିତରର କୌଣସି ମାମଲାରେ କେହି ବି ହସ୍ତକ୍ଷେପ କରିବା ଭଳି କ୍ଷମତା ନାହିଁ୤ ତେଣୁ ଏବେ ମଧ୍ୟ ଯାହା ଦଇତାପତି ଚାହିଁବେ ତାହା ହେବ ବୋଲି ଆମେ ଭାବିନେବା ଉଚିତ୤ ହୁଏତ ଏହି କାର୍ଯ୍ୟକ୍ରମ ସମୟରେ ଦଇତାପତି ମାନଙ୍କୁ କୌଣସି ଅଧିକ ଆୟର ସମ୍ଭାବନା ଦେଖାଯାଉନଥିବ ତେଣୁ ସେମାନେ ଏହାକୁ ବନ୍ଦ କରିଦେବାକୁ ସମର୍ଥନ କରୁଥିବେ୤ ସେ ଯା ହେଉ, ପୁରୀ ଶ୍ରୀମନ୍ଦିର ଉଭୟ ରାଜତନ୍ତ୍ର ଓ ଗଣତନ୍ତ୍ରରୁ ଉର୍ଦ୍ଧ୍ବରେ ବୋଲି ପ୍ରମାଣିତ ହୋଇସାରିଲାଣି, ଏବେ ଖାଲି ଦେଖିବାକୁ ବାକି ରହିଲା, କେଉଁଦିନ ଏଇ ମନ୍ଦିରକୁ ଏଇ ଦଇତାପତିମାନେ ନିଜ ପରିବାରର ସମ୍ପତ୍ତି ବୋଲି ପ୍ରମାଣିତ କରି ବିକ୍ରୀ କରିଦେବେ୤

Back to Previous Page