ଘରେ ପହଞ୍ଚିବାପରେ ହାତରୁ ବ୍ୟାଗ୍ ଆଉ ଛତା ନେଇ ଠିକଣା ସ୍ଥାନରେ ଥୋଇଦେଇ ପାଣି ଗିଲାସେ ଧରି ଆସି ପହଞ୍ଚିଲା ସୁଶୀଳା ଝିଅ ହାତରୁ ପାଣି ଗ୍ଲାସ୍ ନେଇ ଚେୟାର ଉପରେ ବସିପଡ଼ିଲେ ପ୍ରଧାନବାବୁ ଝିଅ ସାଙ୍ଗେ ସାଙ୍ଗେ ଫ୍ୟାନ୍ଟା ଚାଲୁ କରିଦେଲା ସେ ପାଣି ପିଇବା ସାରିଦେଇ ନିଜ କୋଠରୀକୁ ପ୍ରବେଶ କଲେ ଓ ପୋଷାକ ପରିବର୍ତ୍ତନ କରିଦେଇ ପୁଣି ବୈଠକକୁ ଆସିବା ବେଳକୁ ଡାକ ପକାଇଲା ସୁଶୀଳା, ‘ବାପା, ଖାଇବାକୁ ବାଢ଼ି ଦେଇଛି ଆସ’
ପ୍ରଧାନବାବୁଙ୍କ ଏକମାତ୍ର ଝିଅ ସୁଶୀଳା ଅଜସ୍ର ସମ୍ପତ୍ତିର ମାଲିକ ପ୍ରଧାନବାବୁ ସୁଶୀଳା ଜନ୍ମହେବାପରେ ଆଉ କେବେ ଦ୍ବିତୀୟ ସନ୍ତାନ କଥା ଚିନ୍ତା କରିନାହାନ୍ତି କରିବାର ଆବଶ୍ୟକତା କେବେ ଅନୁଭବ କରିନାହାନ୍ତି ଏମିତି ବି ନୁହେଁ ଯେ କେହି ତାଙ୍କୁ ପ୍ରବର୍ତ୍ତାଇ ନାହାନ୍ତି ଅନେକେ କହିଛନ୍ତି, ‘ଆଜ୍ଞା, ଏତେ ସମ୍ପତ୍ତିବାଡ଼ି କଣ ହେବ? ପୁଅଟିଏ ନଥିଲେ ସବୁ ଛାର’ ପ୍ରଧାନବାବୁ ହସିଦେଇ ଚାଲିଆସନ୍ତି, ପଚାରିଲେ କହନ୍ତି, ସେ ସବୁ ତୁମେ ବୁଝିପାରିବ ନାହିଁ
ପୁରୁଷ ପ୍ରଧାନ ଆମ ସମାଜରେ ଝିଅମାନଙ୍କ ପ୍ରତି ଦୃଷ୍ଟିକୋଣରେ କୌଣସି ପରିବର୍ତ୍ତନ ହୋଇନାହିଁ ଏବେ ବି କନ୍ୟାଭୃଣ ହତ୍ୟା ହେଉଛି ଏବେ ବି ଝିଅମାନଙ୍କୁ ସର୍ବସମ୍ମୁଖରେ ଲାଞ୍ଛିତା ଅପମାନିତା କରାଯାଉଛି ଏବେ ବି ଯୌତୁକ ପାଇଁ ଝିଅମାନଙ୍କୁ ମାରି ଦିଆଯାଉଛି ବିଗତ ଦିନର କିଛି ଖବର କାଗଜ ପଢ଼ିବା ପରେ ମନରେ ସ୍ବତଃ ପ୍ରଶ୍ନ ଆସେ, ଏ ସବୁ କଣ ପାଇଁ ହେଉଛି ? ପୁଅ ଓ ଝିଅ ମଧ୍ୟରେ ଏମିତି ବିଭେଦ କାହିଁକି ? କଣ ଝିଅମାନେ ଏତେ ଅଲୋଡ଼ା ?
କିଛିଦିନ ତଳେ ପ୍ରେମବିବାହ କରିଥିବା ଏକ ଦମ୍ପତ୍ତି ରେଳଯୋଗେ ନିଜ ଘରକୁ ଯାଉଥିବା ବେଳେ କୌଣସି କାରଣରୁ ମନୋମାଳିନ୍ୟ ହେବାପରେ ଗର୍ଭବତୀ ସ୍ତ୍ରୀକୁ ନିଜ ସ୍ବାମୀ ରେଳରୁ ଧକ୍କା ଦେଇ ଚାଲିଯାଇଥିଲା ଚାରିଘଣ୍ଟାକାଳ ସେ ରେଳ ଧାରଣା ପାର୍ଶ୍ବରେ ଅକଥନୀୟ କଷ୍ଟ ଭୋଗି ପଡ଼ିରହି ଏକ ମୃତ ଶିଶୁକୁ ଜନ୍ମଦେବାପରେ ଲୋକଙ୍କ ଦ୍ବାରା ଉଦ୍ଧାର ହୋଇଥିଲା ପୁଣି କିଛିଦିନ ତଳେ ଯୌତୁକ ଦାବୀ ନେଇ ଜଣେ ଇଞ୍ଜିନିୟର ନିଜ ଇଞ୍ଜିନିୟର୍ ସ୍ତ୍ରୀଙ୍କୁ ଛାତ ଉପରୁ ତଳକୁ ଠେଲିଦେଇଥିଲେ ଆଉ ଆଜି ସମ୍ବାଦରେ ପ୍ରକାଶିତ ଖବର ଅନୁଯାୟୀ ଓଡ଼ିଶାର ନୟାଗଡ଼ ଜିଲ୍ଲାର କିଛି ଅଞ୍ଚଳରେ ପୁଅ ତୁଳନାରେ ଝିଅଙ୍କ ସଂଖ୍ୟା ବହୁତ କମ ଖବର ଅନୁଯାୟୀ ଗୋଟିଏ ଅଞ୍ଚଳରେ ପ୍ରତି ହଜାରେ ପୁଅରେ ମାତ୍ର ୪୮୪ ଝିଅ ଅଛନ୍ତି ଏମିତି ଅସମାନତା ହେଲା କେମିତି ? ପ୍ରକୃତିର ନିୟମ ଅନୁଯାୟୀ ପୁଅ ଓ ଝିଅ ସଂଖ୍ୟା ପ୍ରାୟତଃ ସବୁଠି ସମାନୁପାତରେ ରହୁଥିବା ବେଳେ ନୟାଗଡ଼ ଜିଲ୍ଲାର ଦୃଶ୍ୟ ଏହାର ସମ୍ପୂର୍ଣ୍ଣ ବିପରୀତ ଏଠାରେ ଉଲ୍ଲେଖନୀୟ ଯେ ବିଗତ କିଛି ବର୍ଷତଳେ ଏହି ଜିଲ୍ଲାରେ କନ୍ୟାଭୃଣ ହତ୍ୟା ମାମଲା ସାମନାକୁ ଆସିଥିଲା, ଯେତେବେଳେ ଅଗଣିତ କନ୍ୟାଭୃଣ ଲୋକଙ୍କ ଦ୍ବାରା ଉନ୍ମୋଚିତ ହୋଇଥିଲା ଏହାକୁ ନେଇ ସମଗ୍ର ରାଜ୍ୟରେ ଆଲୋଡ଼ନ ସୃଷ୍ଟି ହୋଇଥିଲା
ସେ ଯା ହେଉ ଦିନକୁ ଦିନ କମ ହେଉଥିବା କନ୍ୟାସଂଖ୍ୟା ନିଶ୍ଚୟଭାବରେ ଉଦ୍ବେଗଜନକ କିଏ କାହିଁକି ଏବଂ କେମିତି ଏହି ପରିସ୍ଥିତିକୁ ସୃଷ୍ଟି କରିଲା ? ଯଦି କନ୍ୟା ସଂଖ୍ୟା ଏମିତି ଦରରେ କମ ହୁଏ ତେବେ, ଆଗକୁ ବାହା ହେବା ଯୋଗ୍ୟ କନ୍ୟାଟିଏ ମିଳିବା କଷ୍ଟକର ବ୍ୟାପାର ହୋଇଯିବ କନ୍ୟାଟିଏ ଘରର ଶୋଭା ବଢ଼ାଏ ବୋଲି କହନ୍ତି, କିନ୍ତୁ ବର୍ତ୍ତମାନର ପରିସ୍ଥିତିରେ ପୁଅପାଇଁ ଅହେତୁକ ବ୍ୟାକୁଳ ପିତାମାତା କନ୍ୟାଭୃଣ ହତ୍ୟାକରିବାକୁ ପଛାଉନାହାନ୍ତି ଏହା ଆଦୌ ଗ୍ରହଣୀୟ ନୁହେଁ ସାଂପ୍ରତିକ ସମାଜରେ ପୁଅ ଓ ଝିଅ ମଧ୍ୟରେ କିଛି ଫରକ୍ ନଥିବା ବେଳେ, କିନ୍ତୁ ଆମ ଚିନ୍ତାଧାରା ଆଧୁନିକ ହୋଇପାରିନାହିଁ ଝିଅମାନେ ଡାକ୍ତର, ଇଞ୍ଜିନିୟର ହେଲେଣି, ଜୀବନର ପ୍ରତ୍ୟେକ କ୍ଷେତ୍ରରେ ସେମାନେ ପୁରୁଷମାନଙ୍କ ପରି ସବୁ ପ୍ରକାର କାମ କରିବାରେ ପାରଙ୍ଗମ ହେଲେଣି, ତଥାପି ସେମାନଙ୍କ ପ୍ରତି ସାଧାରଣରେ ଥିବା ମନୋବୃତ୍ତି ନୈରାଶ୍ୟଜନକ ଅଟେ ଏହା ପଛରେ ଥିବା ଅନେକ କାରଣ ମଧ୍ୟରୁ ହୁଏତ ଯୌତୁକ ସମସ୍ୟା, ଯୌନ ଅପରାଧଗତ ସମସ୍ୟା ମୁଖ୍ୟ ହୋଇପାରେ
ପରିବାରରେ ପୁଅଟିଏକୁ ଯେମିତି ଦାୟିତ୍ବବାନ ଓ ପରିବାରର ଉତ୍ତରଦାୟାଦ ବୋଲି ବିବେଚନା କରାଯାଏ, ଝିଅମାନଙ୍କୁ ସେମିତି କରାଯାଏ ନାହିଁ, ବରଂ ଝିଅଟିଏ ଥିଲେ ତାହା ପରିବାର ଉପରେ ବୋଝ ବୋଲି ଅନେକ ଭାବନ୍ତି ପ୍ରତି ମୁହୂର୍ତ୍ତରେ ଝିଅଟିକୁ ସମ୍ମାନ / ଇଜ୍ଜତକୁ ଧରି ରଖି ବଞ୍ଚିବାର କଳା ଶିଖାଇ ଦିଆଯାଏ ଝିଅଟିଏ ପାଇଁ ତା ଶରୀର ହୋଇଯାଏ ସର୍ବଶ୍ବ ଥରେ ଏହା କଳୁଷିତ ହୋଇଗଲେ ସବୁ କିଛି ସରିଗଲା ବୋଲି ଶିଖାଇ ଦିଆଯାଏ ସେଇଥିପାଇଁ ନିଜର ଶିକ୍ଷାଗତ ଯୋଗ୍ୟତା ଥାଇ ସୁଦ୍ଧା ଅନେକ କନ୍ୟା ସମାଜରେ ହୀନମଣ୍ୟତାର ଶୀକାର ହୋଇଥାନ୍ତି ଯେଉଁ ଅଳ୍ପ କିଛି ଝିଅ ନିଜର ଅଧିକାର ପାଇଁ ଆଗଭର ହୁଅନ୍ତି ସେମାନଙ୍କୁ ଅଣ୍ଡିରାଚଣ୍ଡି ବୋଲି ଆଖ୍ୟା ଦେଇ ଦିଆଯାଏ ସେହିଭଳି ଝିଅମାନଙ୍କୁ ସାମାଜିକ ଭାବରେ ବାସନ୍ଦ କରାଯିବା ମଧ୍ୟ ଦେଖାଯାଏ ପୁଅମାନେ ସ୍ବଚ୍ଛନ୍ଦ ଭାବରେ ନିର୍ଭୟରେ ବିଚରଣ କରିପାରନ୍ତି ଏବଂ ସ୍ଥଳବିଶେଷରେ ସେମାନେ ଝିଅମାନଙ୍କ ପ୍ରତି ଖରାପ ଆଚରଣ ପ୍ରଦର୍ଶନ କରନ୍ତି, କିନ୍ତୁ ସେ ସବୁ କାହାକୁ ଦେଖାଯାଏ ନାହିଁ, ସବୁ ଦୋଷ ଲଦିଦିଆଯାଏ ଝିଅ ଉପରେ କୁହାଯାଏ, ଝିଅର ହିଁ ଦୋଷ କିଛି ବୁଦ୍ଧିଜୀବି କହନ୍ତି, ଘରେ ଚାବି ପକାଇଲେ ଚୋରୀ ହୁଏନାହିଁ, ସେହିପରି ନିଜ ଇଜ୍ଜତ ବା ସମ୍ମାନ ପ୍ରତି ସଚେତନ ଥିଲେ କୌଣସି ଝିଅକୁ କେହି ବି ଯୌନଉତ୍ପୀଡ଼ନ ଦେଇ ପାରିବ ନାହିଁ
ଓଡ଼ିଆରେ କଥାଟିଏ ଅଛି, ‘ଝିଅ ଜନମ, ପରଘରକୁ...!!!’ ସେଇଥିପାଇଁ ମଧ୍ୟ ଅନେକ ପରିବାରରେ ଝିଅମାନଙ୍କୁ ଅବହେଳା କରାଯାଏ ସେମାନଙ୍କ ଶିକ୍ଷାଦିକ୍ଷାରେ ମଧ୍ୟ ପାତରଅନ୍ତର ନୀତି ଗ୍ରହଣ କରାଯାଏ ପୁଅମାନଙ୍କୁ ସବୁ ସୁବିଧା ଯୋଗାଇଦେଉଥିବା ପିତାମାତା ଝିଅମାନଙ୍କ ବେଳକୁ ନୀରବତା ଅବଲମ୍ବନ କରନ୍ତି କେହି କେହି କହନ୍ତି, ‘ଅଧିକ ପାଠ ପଢ଼ିଲେ, ସେତେ ପାଠ ପଢ଼ିଥିବା ବର ଖୋଜିବାକୁ ପଡ଼ିବ ଯେତେ ଅଧିକ ପଢୁଆ ବର, ସେତେ ଅଧିକ ଯୌତୁକ ସେଇଥିପାଇଁ ଯାହା ଯେତିକି ପଢୁଛି ପଢୁ ଚାକିରୀ କରିବ କି ଆଉ ? ଘର ସମ୍ଭାଳିବା କଥା ଆଗ ଶିଖ ରୋଷେଇ କର, ଲୁଗା ଧୁଆ, ଘର ସଫା ଏ ସବୁ ଶିଖିଲେ ସିନା ଶାଶୁଘରେ ଖୁସିରେ ରହିବୁ?’ ବାସ୍, ଏଇ ଯୁକ୍ତି ଆଗକୁ ଆଉ କେହି ଯୁକ୍ତି କରିବାର ନାହିଁ ଉଚ୍ଚ ଶିକ୍ଷିତ ଲୋକମାନେ ମଧ୍ୟ ଏହିପରି ମତବାଦକୁ ପ୍ରୋତ୍ସାହନ ଦିଅନ୍ତି ଯୌତୁକ ଏକ ସାମାଜିକ ବ୍ୟାଧି ବୋଲି ଯେତେ ଉଚ୍ଚରେ କହିଲେ ସୁଦ୍ଧା, ଏହା ସମସ୍ତେ ଜାଣନ୍ତି, ଯୌତୁକ ଦିଆନିଆ ସବୁଠି ହେଉଛି ସବୁ ସରକାରୀ ନିୟମ ନାଲିଫିତା ତଳେ ରହିଯାଉଛି କେହି କେହି କହିବେ, ‘ଯୌତୁକ ନ ଆଣିଲେ, ଲୋକ ଭାବିବେ ପୁଅର କିଛି ଅଭାବ ରହିଯାଇଛି’ ସତେ ଯେମିତି ଯୌତୁକ ଆଣିବାଟା ଏକ ଗୌରବର ବିଷୟ ଏଥିପାଇଁ ଅନେକ ମଧ୍ୟବିତ୍ତ ପରିବାର ସର୍ବସ୍ବାନ୍ତ ହେବାର ନଜିର ଆମ ସମାଜରେ ଦେଖିବାକୁ ମିଳେ ଯୌତୁକ ପାଇଁ ବଧୁହତ୍ୟା ଅନେକ ହେଉଛି କିଛି ଟଙ୍କା ଆଗରେ ମନୁଷ୍ୟର ଜୀବନଟା ମୂଲ୍ୟହୀନ ହେଇଯାଉଛି ବରଂ ସେସବୁ ବିପତ୍ତିରୁ ରକ୍ଷାପାଇବା ପାଇଁ ଝିଅ ଜନ୍ମ ଦେବା ଅନୁଚିତ ବୋଲି ଅନେକ ଧରି ନିଅନ୍ତି
ଏହି ଦୁଇଟି କାରଣ ବ୍ୟତୀତ ହୁଏତ ଆହୁରି ଅନେକ କାରଣ ଥାଇପାରେ ସେ ସବୁ ପାଠକ ନିଜେ ଚିନ୍ତା କରି ଦେଖନ୍ତୁ ଏବଂ ସୁଚିନ୍ତିତ ମତାମତ ଆମ ନିକଟକୁ ଲେଖି ପଠାନ୍ତୁ ଆମ ଇମେଲ୍ ଠିକଣା ହେଲା : aahwaan@gmail.com
ଧନ୍ୟବାଦ
ଡା ଜ୍ୟୋତି ପ୍ରସାଦ ପଟ୍ଟନାୟକ
ସମ୍ପର୍କ ଦୁର୍ବଳ ହୁଏ କାହିଁକି ?
ଏଠାରେ ପଢ଼ନ୍ତୁ !
ଥାଇରଏଡ଼ (ଗଳଗ୍ରନ୍ଥି) ସମସ୍ୟା ଏବଂ ଏହାର ସମାଧାନ
ଏଠାରେ ପଢ଼ନ୍ତୁ !